Со измените и дополнувањето на Правилникот за спроведување на Законот за акцизите (Службен весник на Р.М., бр. 53/09 од 23 Април 2009 година), од 1 мај 2009 година во употреба се пуштаат нови контролни марки (бандероли) за обележување на тутунски добра и алкохолни пијалоци.
Новите контролни марки се изработени според највисоките стандарди и повеќестепено ниво на безбедност. Холограмската лента и други елементи, кои се составен дел на контролната марка, обезбедуваат висок степен на заштита, превенција и лесно детектирање на евентуално фалсификување. Според начинот на изработка и нивото на заштита, новите контролни марки се со највисок квалитет во регионот и се во согласност со европските стандарди.
Управата за јавни приходи е целосно подготвена за издавање на новите контролни марки, кои можат да се преземат од УЈП - Генерална Дирекција, започнувајќи од 5 мај 2009 година.
Акцизните добра обележани со старите контролни марки, подигнати до денот на отпочнувањето на примената на новиот правилник, остануваат во акцизно правен слободен промет до нивната продажба, а најдоцна до 30 април 2010 година.
Исто така, ги информираме даночните обврзници дека е извршена замена и на барањата Б-МЕА и Б-ТД, како и пријавите П-МЕА и П-ТД.