Билансот на приходи и расходи (образец “Б”) го пополнува обврзникот на персоналниот данок на доход регистриран како трговец-поединец, како и физичко лице кое се занимава сo земјоделска дејност, со занаетчиска дејност и лице кое врши услуга или слободно занимање, а кој остварува приходи од самостојна дејност (приходите остварени од стопанската дејност, од давање професионални и други интелектуални услуги и од други дејности чија трајна цел е остварување на приходи).

Образецот “Б”, заедно со образецот “ПДД-ДБ”, најдоцна до 15 март во наредната година се поднесува до Управата за јавни приходи и до Централниот регистар, во по еден примерок.

Даночниот период за кој се утврдуваат вкупните приходи и вкупните расходи во работењето на даночниот обврзник е една календарска година.

Доколку даночниот обврзник вршел самостојна дејност за период пократок од една календарска година, за даночен период се смета периодот од годината во кој обврзникот работел.