Владата на Република Северна Македонија на вонредна седница одржана на 5 април 2026 година донесе Одлука за изменување на Одлуката за определување на видот на добрата и временскиот период на примена на повластена даночна стапка. Согласно Одлуката, примената на намалената стапка на ДДВ за енергенти (горива) од 10% продолжува да важи до 20 април 2026 година (24:00 часот).

Во таа насока, сите даночни обврзници кои вршат трговија на мало со моторни горива и мазива во специјализирани продавници се должни да бидат усогласени согласно Тарифникот од Одлуката за определување на видот на добрата и временскиот период на примена на повластена даночна стапка, односно да им се прилагодени фискалните системи, ценовниците и фактурирањето, со цел правилна пресметка, евидентирање и прикажување на повластената стапка на ДДВ од 10%.

Управата за јавни приходи укажува дека примената на оваа мерка мора да биде доследна и во согласност со законските одредби. УЈП ќе врши засилени контроли со цел да се обезбеди целосно почитување на истите, при што за евентуални неправилности ќе бидат преземени соодветни законски мерки.

Ги повикуваме сите засегнати субјекти да постапуваат согласно прописите и да придонесат кон транспарентно и законито работење, во интерес на граѓаните и економијата.