На манифестацијата „Сајт на годината 2012“, која се одржа на 13.12.2012 година во Инфо центарот на ЕУ во Скопје, во категоријата на најдобар сајт за владини/државни институции, веб страницата на УЈП www.ujp.gov.mk го освои третото место.
Од номинираните сајтови во оваа категорија, второто место е доделено на Државниот завод за статистика, а за најдобар сајт на дражавна институција е прогласен www.katastar.gov.mk

Изборот „Сајт на годината" кој се случува по трет пат има за цел да придонесе кон развојот на домашните веб-страници и да додели сертификати и признанија на луѓето кои работат во развојот на онлајн-медиумите во земјава. Организатори на настанот се „Медиа солушнс" и системот за онлајн-реклами keepaneye.mk. Манифестацијата годинава се одржа под покровителство на Словачката амбасада во Македонија и „Здружението за интерактивно огласување – ИАБ Македонија”.

Номинираните беа селектирани од над 200 предлози, а најтесната селекција е направена од 7.200 гласа добиени на Интернет. Конечниот збор за победниците по категории го даде шестчлено жири, со сооднос 60% од жирито и 40% од веб читателите, кое ги оценуваше сајтовите според технички параметри, дизајн, функционалност и употребливоста, содржината, иновативноста и креативноста.

Изборот на најдобрите сајтови го отвори Министерот за информатичко општество и администрација, Иво Ивановски.
- Министерството за информатичко општество и администрација токму на манифестацијата „Сајт на годината“ лани го објави проектот за поддршка на е-трговијата којшто веќе е во завршна фаза. По разгледувањето на најдобрите бизнис-планови беа поддржани повеќе вакви сајтови, неколку веќе се промовираа, а во следниот период ќе бидат претставени и останатите. Освен оваа активност, министерството изработи голем број интернет-страници на институции, а сè со цел граѓаните да бидат што подобро опслужени. Системот за е-даноци, како и тој за отворени податоци, се дел од најзначајните што ги пуштивме во употреба – рече првиот човек на Министерството за информатичко општество и администрација.

Истакнувајќи ја важноста на информатичко-комуникациските технологии во светот во којшто живееме и честитајќи им на победниците, писмо со поддршка на манифестацијата испрати Претседателот на РМ, д-р Ѓорѓе Иванов.
- Демократскиот и технолошкиот напредок денес се суштински поврзани и меѓузависни процеси. Општествата кои сè повеќе се дигитализираат и се отвораат кон информатичко-комуникациските технологии, се во предност и токму тие ќе ги вкусат плодовите од овој процес. Ме радува фактот што Република Македонија во ниеден момент не заостанува зад светските трендови и иновации во сферата на веб-технологијата, и што македонските сајтови според квалитетот, дизајнот и функционалноста се вбројуваат меѓу најдобрите. Тоа го потврдува и острата конкуренција на веб-страни кои и годинава влегоа во потесен избор за признанието „Најдобар сајт на годината“ - истакна претседателот Иванов.

За повеќе информации види http://sajtnagodinata.mk/