Делегација на Управата за јавни приходи предводена од главниот преговарач за РСМ, вицепремиерот за европски прашања Бојан Маричиќ и директорката на Управата за јавни приходи Сања Лукаревска денес на состанокот за објаснувачки скрининг за Поглавје – 16, Оданочување ја започнаа првата фаза од преговорите со Европската Унија.
На состанокот од страна на претставниците на Европската комисија беше претставена регулативата на ЕУ која се однесува на директното и индиректното оданочување донесено при крајот на 2018 година, спречување на даночното затајување, заемна помош во областа на индиректно оданочување и тековни случувања во врска со Директивите за развојот на е-трговијата поврзана со ДДВ. Во наредниот период ќе следуваат состаноци на билатерално ниво, на кој ќе се презентира степенот на усогласеност на домашното со правото на ЕУ, зајакнување на институционалните и административните капацитети, потребните човечки, финансиски и ИТ ресурси за спроведување на европските стандарди.
Напредок во намалувањето на административниот товар за даночните обврзници и постапката за поврат на ДДВ постои, но треба да се работи интезивно на ефикасно спроведување на Стратегијата за реформа на даночниот систем за периодот од 2021-2025 година, со цел ефективна автоматска размена на даночни информации со земјите членки на ЕУ.
На овој објаснувачки скрининг во Брисел, за Поглавјето 16 – Оданочување, покрај Управата за јавни приходи учествуваше и Албанската даночната администрација.